بكالوريتي مستقبلي

السلام عليكم

نحن نهتم بزيارتكم لمنتدانا .. غايتنا تقديم الفائدة العلمية والتواصل بين طلاب البكالوريا العلمي في ثانويات دمشق
إذا كان هذا المنتدى يُفيدك أو تستطيع أن تفيد غيرك من طلابٍ متعطشين لاستقاء معين العلم
بادر فوراً بالتسجيل في منتدانا .. وستكون مسرور إن شاء الله تعالى

ولكن: تذكّر دوماً .. نحن نسعى لتحقيق فائدة علمية .. ولا يهمّنا عدد المشاركات غير المفيدة.

مجلس الإدارة
cheers
بكالوريتي مستقبلي

منتدى طلاب البكالوريا العلمي في ثانويات دمشق

سيتم توسيع المنتدى قريباً بمساعدتكم إن شاء الله إقتراحاتكم تسرنا
تم إضافة نظام النقاط لتشجيع المساهمة في المنتديات العلمية حيث يتم احتساب 5 نقاط لكل موضوع جديد و 2 نقاط لكل مساهمة في المنتديات العلمية فقط
اجمع 10 مساهمات واحصل على شارة "عضو فعّال" تلقائياً

    ذكرى بلبل

    شاطر
    avatar
    Admin
    مدير المنتدى
    مدير المنتدى

    المدرسة : ثانوية الســـعادة
    عدد المساهمات : 17
    نقاط : 13
    تاريخ التسجيل : 18/09/2009
    العمر : 25
    الموقع : bakaloria.3oloum.org

    ذكرى بلبل

    مُساهمة من طرف Admin في السبت سبتمبر 26, 2009 8:44 am

    بتمنى كل شي رح اكتبو يفيد الطلاب والطالبات اللي عنجد بدهن ينجحوا ويتفوقوا.
    بالصيفية دخلت دورة و ماستفدت منها كثير لأنو الجو كان "جو صيفية" و ما كان إلي خلق حفظ وتركيز ومتابعة. ولما ابتدت المدارس التزمت لأنو الشغلة قلبت جد. وكل درس أخدتوا بالمدرسة براجعوا بالبيت و بهتم بوظايفي وبحضّر لبعض المواد، وبآخر كل أسبوع بعيد كل شي أخدتو بالأسبوع "إذا لحقت" أو بدرس اللي ما ركّزتو بالأسبوع أو الأسبوع اللي قبلو.

    من أول السنة كنت واضعة الـ260 هدف لهدف أكبر، وكنت عم اشتغل كثير لحصّل هالمجموع، والحمدالله جبت 257 و المهم إنو دخلت الفرع اللي بدي ياه و كنت كل ما فكّر بسلبية و تشاؤم أحوّل تفكيري للتفكير الإيجابي والمتفائل.

    كان وقت المدرسة طبعاً ما بيسمح لدراسة 24\24، فعملت برنامج استيقاظ، نوم، دراسة،....الخ. وكنت بأيام المدرسة أدرس حوالي 8 ساعات وكنت متابعة دروسي، و الحمدالله ما كنت بحاجة لأي أستاذ خصوصي. وطبعاً حل الوظائف والمذاكرات والشفهي من أحد أسباب المتابعة وكنت أعرف من خلالها مستوى دراستي. الحضور و عدم التغيب واجب وما بتذكر إني ضيعت حصة طوال السنة الدراسية بإرادتي لأنو الحضور بركز المعلومات وبيساعد على الحفظ وبيوفر وقت إذا كنت بدك تفهم الدرس من أول مرة وممكن أي سؤال يخطر ببالك تسأل الاستاذ عنو. أحد أسباب نجاحي هو الوقت و في فرق بينو وبين تنظيم الوقت. بالنسبة إلي كان عندي الوقت الكافي لأدرس وأعيد المنهاج مرة ومرتين وثلاثة أو أكتر لبعض المواد. وأنا ما بدي اقطع برزق الأساتذة بس برأيي إنو الطالب إذا درس وما اعتمد عأساتذة خصوصي وإذا ما داوم بمعاهد بعد المدرسة رح يجيب علامات عالية لأنو اعتمد على حالو وكان عندو وقت كافي ليراجع دروسو ويحل وظايفو و يحضر برنامج بكرة. صحيح في طلاب بيجيبو أساتذة عالبيت وبيجيبو علامات عالية آخر السنة بس بيكونوا تعبوا كثير كثير وحرموا حالن من شغلات كثير أهما النوم و الراحة النفسية.

    و كثير من الطلاب ياللي بيجيبو أساتذة خصوصي بيدرسوا شو رح يعطيهم، طبعاً قبل ما يجي بثلاث أربع ساعات وبيحلّوا شو عطاهم وظايف، وبعدين بيجي الأستاذ وكمان بدو ساعتين وبعد ما يمشي الأستاذ، بدو الطالب شي ساعتين استراحة، وبيخلص النهار والطالب ما درس غير المادة اللي أخذها اليوم. والمصيبة الأكبر لما الطالب يروح لمعهد بعد المدرسة، وبعدين بيجي الاستاذ الخصوصي، و إذا لقى الطالب وقت ليتنفس "بيكون كتير منيح". وآخر السنة بيجي الفحص وبتطلع النتائج والطالب اللي أهلو وأساتذتو متوقعينللو 260 بيجيب 160. و هاد واقع...

    السبب الأكبر في نجاحي كان توفيق من رب العالمين وكنت والحمدالله قائمة بواجبات ربي و مرضية الوالدين و بالتالي رضي الله علي. و أكيد رضا الوالدين ومساعدتهم وصبرهم هو السبب الأهم بعد توفيق الله. وكانت أمي دايماً تصحّيني وتضلها فوق راسي حتى إصحىو توفرلي كل شي، وأبي كان مسافر وكل يوم يحكي معي ويشجعني وكانت إلي غرفة خاصة أدرس فيها يعني كل شي كان موفرلي والحمدالله. ونصيحة إذا بدك تدرس اختار مكان بتحبو بالبيت وخليه معتزلك.

    طبعاً للمدرسة والمدرسين دور كبير بالنجاح. وأساتذتي الله يعطيهم العافية ما قصروا وشرحولنا المنهاج بشكل كامل ووافي وإذا خطر عبالي أي سؤال كنت اسأل الأستاذ وما كنت أخجل من الأسئلة لأنو الأسئلة ساعدتني على فهم المنهاج أكثر وأكثر.

    بعد ما خلصنا كل الدروس وقدمنا الفحوص التجريبية دخلنا بشهر الانقطاع، ووضعت برنامج للمواد ووقت الفيقة والنوم وكنت محددة أوقات الاسترحة، يعني كنت مرتاحة كثير، وكنت اصحى من الساعة 4:30 الفجر وأنام الساعة 10:30-11بالليل كان مجموع ساعات دراستي حوالي 15 ساعة باليوم. و ممكن طلاب يشوفوه قليل بالنسبة لطالب بكالوريا بشهر التحضير للفحص، بس أنا كنت كثير مرتاحة وما انضغطط أبداً، ودراسة الـ 24\24 ما كانت تعجبني لأنها بترهق الطالب جسدياً ومعنوياً و روحو بتزهق. وما في مانع أبداً إنو الطالب يعملو مشوار من فترة لفترة، يغير جو ويرفه عن نفسه.

    وقت الفحص كنت آخر رياحة و كنت قدّم الفحص وأنا واثقة من حالي مقتنعة إنو الله رح يحققلي اللي بدي ياه، و الواحد لازم يتوكل على الله مو يتواكل ولازم "يأخذ بأسباب النجاح".

    أولاً و أخيراً الشكر و الفضل لربي لأنو من دون توفيقو ما كنت رح وصّل للي وصّلتلو، والشكر طبعاً لأهلي اللي وقفوا معي طول السنة ولأساتذتي وآنساتي، وشكراً لكل من ساهم ولو بجزء بسيط بتفوقي ونجاحي.

    ملاحظة:البكالوريا رح تكون -مستقبلاً- من أجمل أيام حياتك. اشتغل عحالك منيح لتحصد أعلى النتائج.ختاماً عذراً إن كنت أطلت عليكم ولكن هي بضعة كلمات متواضعة أحببت أن أنقلها لكم علّ البعض منكم يجد فيها مايفيده ويعينه على الطريق فيحقق ما يصبو إليه.. والله ولي التوفيق.


    _________________
    يحرق اخت البكالوريا ما كانت تخلص Evil or Very Mad bounce

      الوقت/التاريخ الآن هو السبت سبتمبر 23, 2017 7:47 am